Навіны ўніверсітэта

Тыдзень бацькоўскай любовi на лінгвістычным факультэце быў напоўнены самымі разнастайнымі мерапрыемствамі: дыялогавыя пляцоўкі, тэматычныя інфармацыйныя гадзіны ў групах, віншавальныя праграмы і акцыі для выкладчыкаў і работнікаў факультэта ад студэнцкага савета і Маладзёжнага крыла ПА ГА «Беларускі саюз жанчын».

Напярэдадні Дня маці на лінгвістычным факультэце адбылася дыялогавая пляцоўка «Размова аб важным: шчаслівая сям’я – моцная дзяржава», падрыхтаваная членамі Маладзёжнага крыла ПА ГА «Беларускі саюз жанчын». Запрошаным госцем з’яўляўся айцец Віталiй, благачынны Баранавіцкай акругі Пінскай епархіі, настаяцель храма Святога дабравернага князя Аляксандра Неўскага г. Баранавічы, кандыдат багаслоўя, протаіерэй.

У ходзе свайго выступлення айцец Віталiй удзяліў увагу такім аспектам як каштоўнасць чалавечага жыцця, роля сям’і ў жыцці кожнага чалавека, узаемаадносіны паміж бацькамі і дзецьмі, выклікі сучаснага свету і неабходнасць захавання маральных нормаў маладымі людзьмі ў паўсядзённым жыцці. Айцец Віталiй адзначыў важнасць духоўна-маральных асноў у жыцці моладзі. Члены Маладзёжнага крыла пазнаёмілі студэнтаў з мерамі дзяржаўнай падтрымкі сем’яў, якія выхоўваюць дзяцей.

Акрамя таго, прайшлі выстава творчых прац «Мама свет падарыла мне і табе» і акцыі «Адкрыты ліст каханай маме» і «Адкрыты ліст каханаму тату», «Словы падзякі бацькам». Кожны студэнт меў магчымасць паўдзельнічаць у гэтых праектах і выказаць сваю павагу і ўдзячнасць бацькам, сказаць найважнейшыя словы.

Віншавальная акцыя ад членаў Маладзёжнага крыла ПА ГА «Беларускі саюз жанчын» «Да мам i тат з павагай і каханнем» парадавала і падарыла прыемныя моманты выкладчыкам і супрацаўнікам універсітэта.

У Telegram-канале «Лінгвісты БарДУ» прайшоў чэлендж «Тыдзень сям’і: 5 дзён аб бацьках». Увесь тыдзень быў падзелены на тэматычныя дні. Штодня студэнты дзяліліся, сямейнымі традыцыямі, успамінамі з дзяцінства, вопытам, прысвячалі бацькам словы падзякі і інш.

Усе мерапрыемствы былі накіраваны на фарміраванне ў навучэнцаў традыцыйных сямейных каштоўнасцей, паважлівага стаўлення і пачуцця падзякі да бацькоў, разумення важнасці сям’і ў жыцці чалавека і грамадства, выхаванне асноў адказнага бацькоўства.