Навіны ўніверсітэта

У рамках «Месяца першакурсніка» на лінгвістычным факультэце прайшло адно з самых маштабных мерапрыемстваў для студэнтаў I курса – «АРБУЗНІК-2026».

«Арбузнік-2026» – гэта брэндавае мерапрыемства студэнцкага савета лінгвістычнага факультэта для першакурснікаў. Каманды навучальных груп I курса спаборнічаюць паміж сабой, праходзяць шматлікія займальныя квэсты, у якіх трэба праявіць кемлівасць і камандны дух, збіраюць запаветныя балы. Арганізатары вызначаюць пераможцу, які і атрымоўвае галоўны прыз.

Вечар адкрылі вядучыя – Іван Вараб’ёў і Кацярына Адамовіч, якія адразу задалі тон мерапрыемству, стварылі цёплую і жывую атмасферу.

Са словамі парады да студэнтаў звярнуліся паважаныя госці: Пучынская Таццяна Міхайлаўна, дэкан лінгвістычнага факультэта, кандыдат педагагічных навук, дацэнт, і Васільчук Яўгенія Мікалаеўна, намеснік дэкана па ідэалагічнай і выхаваўчай рабоце.

Для першакурснікаў прагучалі музычныя падарункі ад Дзіяны Зарэцкай і Дашы Масейкі, а таксама яркі харэаграфічны нумар гурта сучаснага танца “StandOut”.

Прадстаўнікі ўсіх каманд паспяхова прайшлі інтэрактыў «Паласа перашкод», дзе старасты вучыліся чуць сваю каманду, а таксама легендарны «Модны прысуд» – каманды стваралі касцюмы і прэзентавалі іх пад культавую музыку вядомага праекта.

Кульмінацыяй вечара стала абвяшчэнне вынікаў квэста: групы-пераможцы атрымалі сертыфікаты ў кафэ горада, а галоўнае – званне самай актыўнай і згуртаванай групы першакурснікаў 2026 года. Напрыканцы першакурснікаў прысвяцілі ў студэнты лінгвістычнага факультэта, імі была дадзена ўрачыстая клятва. Фіналам стала агульнае памятнае фота.

Для студэнтаў I курса «Арбузнік-2026» стаў выдатнай магчымасцю бліжэй пазнаёміцца са студэнцкiм саветам факультэта, са сваімі аднагрупнікамі, здабыць новых сяброў, пагрузіцца ў атмасферу студэнцкага жыцця на факультэце і атрымаць новыя прыемныя ўражанні.