Навіны ўніверсітэта

14 красавіка 2026 г. на базе лінгвістычнага факультэта БарДУ пад кіраўніцтвам старшага выкладчыка кафедры тэорыі і практыкі германскіх моў Зоі Іванаўны Корзун прайшоў «Метадычны КВЗ» па выніках вытворчай (пераддыпломнай) практыкі з удзелам студэнтаў груп НА-41 і ЗМ-41.

Дадзенае мерапрыемства было накіравана на абагульненне педагагічнага вопыту, атрыманага будучымі выпускнікамі падчас праходжання практыкі, вызначэнне ўзроўню развіцця прафесійна-педагагічных уменняў (г. зн. праектаваць, планаваць, канструяваць, прагназаваць, арганізоўваць і аналізаваць прафесійную педагагічную дзейнасць).

Прадугледжаныя ў рамках КВЗ конкурсы («Візітная картка», «Знаходлівасць», «Цяжкія пытанні», «Дамашняе заданне», «Тыповыя памылкі») дазволілі вызначыць узровень развіцця моўнай, сацыякультурнай і кампенсаторнай кампетэнцый, а таксама метадычнага мыслення студэнтаў.

Акрамя таго, студэнты маглі прадэманстраваць свае творчыя здольнасці, крэатыўнасць, індывідуальнасць, здольнасць працаваць у камандзе, удзельнічаючы ў конкурсах «Зоркі эстрады на ўроку», «Танцавальны экспромт» і ў конкурсе балельшчыкаў.

Змест выступленняў удзельнікаў мерапрыемства сведчыць аб тым, што пераддыпломная практыка з’яўляецца адным з найважнейшых этапаў у прафесійным станаўленні будучых настаўнікаў, асновай фарміравання індывідуальнага вопыту навучання замежным мовам, пазавучэбнай і выхаваўчай работы з навучэнцамі, а таксама арганізацыйна-метадычнай, самастойнай і вучэбна-даследчай работы.