Навіны ўніверсітэта

21.03.2026 на інжынерным факультэце Баранавіцкага дзяржаўнага ўніверсітэта адбыўся бацькоўскі сход 1 і 2 курсаў. Сустрэча сабрала больш за 60 бацькоў. Асноўнай мэтай мерапрыемства стала пабудова эфектыўнага дыялогу паміж сям'ёй і ўніверсітэтам у працэсе навучання студэнтаў.

Адкрыў сход дэкан факультэта Сотнік Л.Л. У сваім выступленні ён адзначыў высокі ўзровень матывацыі студэнтаў, аднак звярнуў увагу на складанасць інжынерных дысцыплін, якія патрабуюць сістэматычнай самастойнай працы. Леанід Леанідавіч падкрэсліў важнасць кантролю з боку бацькоў за наведвальнасцю і паспяховасцю, асабліва на першым курсе, дзе закладваецца фундамент прафесійных ведаў.

Тэму паспяховасці працягнула вядучы спецыяліст Вадап'ян Н.В. Яна абагульніла вынікі зімовай сесіі, прадэманстраваўшы даныя па ўзроўню паспяховасці студэнтаў. Былі разгледжаны асноўныя прычыны акадэмічных запазычанасцей, а таксама прадстаўлены меры па іх ліквідацыі. Наталля Віктараўна падрабязна расказала пра механізм функцыянавання рэйтынгавай сістэмы ва ўніверсітэце.

Намеснік дэкана па ідэалагічнай і выхаваўчай рабоце Яскевіч І.М. давяла інфармацыю пра магчымасці самарэалізацыі студэнтаў ва ўніверсітэце. Бацькоў зацікавіла дзейнасць студэнцкага савета, студэнцкага навуковага таварыства, спартыўнага клуба, аддзела культуры і творчасці і інш. Асаблівая ўвага была нададзена пытанням пражывання ў інтэрнаце, дзейнасці студэнцкіх атрадаў, прафілактыцы правапарушэнняў, бяспечных паводзін.

У фармаце «пытанне-адказ» бацькі змаглі атрымаць кансультацыі па пытаннях, якія іх цікавяць: ад графіка семестравага кантролю да перспектыў працаўладкавання пасля заканчэння навучання. 

Адміністрацыя факультэта дзякуе бацькам за актыўную пазіцыю і яшчэ раз падкрэслівае, што адкрытасць і супрацоўніцтва — залог паспяховай падрыхтоўкі будучых спецыялістаў, фарміравання дастойных грамадзян сваёй краіны.