Навіны ўніверсітэта

21 кастрычніка ў культурнай прасторы «Кругагляд» адбылася сустрэча, прымеркаваная да Дня бацькоўскай любові і клопату «Бацька! Як шмат у гэтым слове...».

На сустрэчу са студэнтамі былі запрошаны Настаяцель прыхода храма Святога дабравернага князя Аляксандра Неўскага протаіерэй Віталь Лазоўскі і загадчык кафедры псіхалогіі і фізічнага выхавання, кандыдат філасофскіх навук, дацэнт Іцэнка Аляксандр Рыгоравіч.

Душэўная гутарка нашых гасцей са студэнтамі выпускных груп секцыі тэорыі і практыкі ФК-41 і СПД-41 стварыла асаблівую атмасферу даверлівай размовы.

Наталля Апалосаўна Каралёва і Таццяна Вадзімаўна Шчэрба - аўтары праекта «Кругагляд» - правялі сустрэчу з гасцямі ў форме інтэрв'ю. Усім прысутным было цікава пачуць меркаванні нашых гасцей пра важнасць ролі бацькі ў выхаванні.

На сустрэчы разважалі аб якасцях сапраўднага мужчыны, аб традыцыях у сям'і, аб усвядомленым выбары партнёра для жыцця, аб каштоўнасцях бацькоўства.  Размова з моладдзю атрымалася сапраўды шчырай, даверлівай, а галоўнае - цікавай і карыснай.

Студэнткі факультэта педагогікі і псіхалогіі Страпко Анастасія і Слінко Ангеліна падрыхтавалі агляд мастацкай літаратуры, у якой прасочваецца лінія бацькі як настаўніка ці антыпрымера. У завяршэнне сустрэчы госці і слухачы атрымалі музычны падарунак ад студэнта інжынернага факультэта Ягора Смірнова.

Да віншаванняў у гэтае маладое цудоўнае свята далучыўся і Беларускі саюз жанчын. Гасцям і актыўным студэнтам былі ўручаны прыгожыя чайныя наборы.

Няхай гэты дзень стане падставай не толькі для віншаванняў, але і для новых цёплых успамінаў і шчырых эмоцый!