Навіны ўніверсітэта

Літаратурна-музычная гасцёўня «Мы будзем вечна праслаўляць тую жанчыну, чыё імя – маці» адбылася ў бібліятэцы БарДУ. Дзень, напоўнены цяплом і любоўю, прайшоў у студэнцкім літаратурным аб'яднанні «Паэтычны партал». Самае кранальнае і душэўнае свята, прысвечанае Дню маці, адклікаецца ў кожным сэрцы чалавека. Вось і наша праграма пачалася з цёплых прывітальных слоў вядучых-першакурсніц Шаўчук Дар'і і Шышковай Ксеніі.

Пяць таленавітых студэнтаў парадавалі ўдзельнікаў літаратурна - музычнай гасцёўні сваімі вершамі і прозай: Анастасія Трафімук, Арсень Лабко, Анастасія Гузарэвіч, а таксама нашы дэбютанты-Таццяна Кузьміч і Ілля Каструбай.

Маладыя аўтары не проста падаравалі свае творы слухачам, а расчынілі насцеж душу і падзяліліся самымі патаемнымі пачуццямі любові да мамы. Высокай нотай прагучала пачуццё датычнасці да роднай Альма-матэр, бо няма нічога важней, чым людзі, якія далі жыццё і ўмовы для жыццёвага станаўлення і прафесійнага росту.

Упрыгожыла святочную сустрэчу музычным выступам вядомы баранавіцкі бард, кіраўнік народнага калектыву бардаўскай песні «Ваганты» Алена Майсейчык.

У літаратурна-музычнай гасцёўні прынялі ўдзел выдатныя студэнты лінгвістычнага факультэта гр. СЗМк-12 і студэнты факультэта педагогікі і псіхалогіі гр. АПВ-11, якія прыйшлі з сувенірам для Алены Мойсейчик.

Цёплыя эмоцыі гэтага дня засталіся ў нашых сэрцах. Мама - гэта не проста слова, а цэлы свет любові, падтрымкі і бясконцай дабрыні.