Навіны ўніверсітэта

10 сакавіка 2025 г. напярэдадні Дня Канстытуцыі Рэспублікі Беларусь на лінгвістычным факультэце адбылася дыялогавая пляцоўка «Правы і абавязкі чалавека як асобы, як грамадзяніна» з удзелам протаірэя Віталя Лазоўскага, накіраваная на фармаванне ў студэнтаў прававой культуры, актыўнай грамадзянскай пазіцыі, разумення сутнасці і значэння Канстытуцыі Рэспублікі Беларусь, гатоўнасці свядома і актыўна выконваць грамадзянскія абавязкі, выконваць і паважаць законы сваёй краіны.

Падчас мерапрыемства прысутныя азнаёміліся з відэасюжэтам, падрыхтаваным установай «Беларускі дзяржаўны архіў кінафотафонадакументаў», у якім паэтапна прасочваецца гісторыя развіцця асноўнага закона нашай краіны, ад Статута Вялікага княства Літоўскага 1588 г. да сучаснасці.

Намеснік дэкана па ідэалагічнай і выхаваўчай рабоце Я. М. Васільчук звярнула ўвагу студэнтаў на змены і дапаўненні ў Канстытуцыі Рэспублікі Беларусь, прынятыя на рэспубліканскім рэферэндуме 27 лютага 2022 г.

Протаіерэй Віталь Лазоўскі распавёў пра адносіны дзяржавы і царквы, разуменне паняцця «свабода», «права» з пункту гледжання хрысціянства, пра супрацоўніцтва Беларускай праваслаўнай царквы з дзяржаўнымі ўстановамі.