Навіны ўніверсітэта

«Маленькімі крокамі да вялікай мэты», «Беражыце планету», «Захоўвайце электраэнергію!» – хіба можа быць нешта лепшае за гэтыя натхняльныя словы? Безумоўна! І гэта яркія постэры-матыватары з не менш натхняльнымі малюнкамі!

У рамках рэспубліканскай акцыі «Беларусь – энергаэфектыўная краіна» на лінгвістычным факультэце з поспехам прайшла выстава «Энергазберагай», у якой прынялі ўдзел больш за 40 студэнтаў, а таксама навучэнцаў школ і гімназій горада Баранавічы. Арганізатарамі выставы выступілі Алена Ігараўна Грыцкевіч і Кацярына Юр’еўна Панкевіч, выкладчыкі кафедры тэорыі і практыкі германскіх моў лінгвістычнага факультэта.

Старт выставе быў дадзены 11 лістапада 2024 г., у Міжнародны дзень энергазберажэння.

На гэтым маленькім астраўку энергазберажэння можна было ўбачыць усё: ажыўшыя лямпачкі, саюз прыроды і чалавека, планету, якая гіне, і нават сучасных робатаў. Удзельнікі выставы зірнулі на праблему энергазберажэння з розных бакоў, а некаторыя прадэманстравалі свае самыя нечаканыя таленты, паглядзеўшы на праблему і асэнсаваўшы сітуацыю зусім з новага боку. Так, на выставе былі прадстаўлены постэры аб выпрацоўцы энергіі са звычайнага смецця, а таксама захаванні жыццёвай энергіі чалавека.

На суд кампетэнтнага журы было вынесена 37 работ, аб’яднаных адной тэматыкай – энергазберажэнне. У склад журы ўвайшлі:

• Алена Васільеўна Булатая, загадчык кафедры тэорыі і практыкі германскіх моў, кандыдат філалагічных навук, дацэнт;
• Алена Аляксандраўна Лабкоўская, загадчык кафедры прафесійнай іншамоўнай падрыхтоўкі, кандыдат педагагічных навук;
• Ірына Станіславаўна Чуносава, загадчык кафедры філалогіі, кандыдат педагагічных навук;
• Ірына Вячаславаўна Пінюта, дацэнт кафедры прафесійнай іншамоўнай падрыхтоўкі, кандыдат педагагічных навук, дацэнт.

18 лістапада 2024 г. самая вялікая інтрыга на лінгвістычным факультэце вырашылася! Пераможцамі выставы сталі:

• Дыплом І ступені – Валерыя Анцюшэня, 9 «П» клас, ДУА «Сярэдняя школа № 1 г. Баранавічы імя С. І. Грыцаўца»;
• Дыплом ІІ ступені – Назар Жых, 6 «А» клас, ДУА «Сярэдняя школа № 7 г. Баранавічы імя А. І. Валошына»;
• Дыплом ІІІ ступені – Цімафей Майсюк, 7 «Б» клас, ДУА «Сярэдняя школа № 7 г. Баранавічы імя А. І. Валошына».

Спецпрызамі арганізатараў выставы ўзнагароджаны:

• Паліна Мельнікава, група СЗМк-21 ІІ курса лінгвістычнага факультэта;
• Віялета Бязушка і Марыя Данілавіч, група ФБ-21 ІІ курса лінгвістычнага факультэта;
• Таццяна Канапліцкая і Дар’я Пяцібратава, група НА-31 ІІІ курса лінгвістычнага факультэта.

Віншуем пераможцаў і жадаем далейшых поспехаў!