Спецыялізаваны вучэбны кабінет беларускай філалогіі

Спецыялізаваны вучэбны кабінет беларускай філалогіі факультэта славянскіх і германскіх моў БарДУ быў адкрыты ў 2013/2014 навучальным годзе. Прызначэнне кабінета: правядзенне заняткаў па дысцыплінах кафедры з выкарыстаннем ЭСН; папаўненне, выкарыстанне фонда кніг, метадычнай літаратуры па праблемах беларускай філалогіі; правядзенне навукова-метадычных мерапрыемстваў унутрывузаўскага, рэгіянальнага і міжнароднага ўзроўняў; актывізацыя прафарыентацыйнай работы, правядзенне алімпіяд, конкурсаў з удзелам школьнікаў г. Баранавічы, дзён адкрытых дзвярэй.

Кабінет абсталяваны ноўтбукам, насценным экранам, праектарам.

Пры садзеянні дэкана факультэта, загадчыка кафедры, выкладчыкаў напаўненне кабінета метадычнымі матэрыяламі паступова павялічваецца. Наведвальнікі кабінета могуць пазнаёміцца са спецыялізаваным стэндам па беларускай філалогіі, убачыць партрэты беларускіх пісьменнікаў, створаныя рукой баранавіцкага жывапісца Ф. І. Ляхновіча, насценныя фотаздымкі літаратурных герояў (акцёраў Купалаўскага тэатра). Каштоўнасць кабінета складае дараваны фонд навуковай і метадычнай літаратуры па беларускім літаратуразнаўстве і мовазнаўстве, аўдыя- і відэатэка па дысцыплінах кафедры. Асабліва зручным для прэзентацыі матэрыялаў з’яўляецца тое, што інфармацыя захоўваецца як на папяровых, так і на электронных носьбітах.

Для ўсіх зацікаўленых асоб у кабінеце праводзяцца экскурсіі. Іх значэнне заключаецца ў тым, каб спрыяць фарміраванню патрыятычных пачуццяў студэнцкай моладзі і навучэнцаў, развіваць жаданне працягваць лепшыя традыцыі, закладзеныя выкладчыкамі і студэнтамі-філолагамі БарДУ. Абітурыенты пасля наведвання кабінета будуць мець уяўленне пра тое, што Баранавіцкі дзяржаўны ўніверсітэт мае свае традыцыі ў падрыхтоўцы будучых настаўнікаў беларускай мовы і літаратуры.

лінгвістычны факультэт быў сведкам многіх сустрэч студэнтаў і выкладчыкаў з прадстаўнікамі творчай інтэлігенцыі, пісьменнікамі. У фондзе кабінета захоўваюцца відэа- і фотаматэрыялы гэтых сустрэч. Аўдыявізуальны фонд кабінета пастаянна папаўняецца запісамі ўрокаў мовы і літаратуры, твораў вядомых беларускіх пісьменнікаў, а таксама разнастайнай беларускай музыкі, што дапамагае якасна арганізаваць вучэбны працэс.