УНИВЕРСIТЭТ

Ва ўніверсітэце 4-6 мая прайшоў трохдзённы міжнародны студэнцкі форум для лідараў студэнцкага самакіравання «Я кажу "ТАК!"»

 

Ініцыятарам правядзення форуму выступіў аддзел выхаваўчай работы з моладдзю БарДУ пры падтрымцы ўпраўлення па справах моладзі Міністэрства адукацыі Рэспублікі Беларусь.

Тры дні прайшлі без адзінай хвіліны на адпачынак, толькі па 45 хвілін на сняданак, абед і вячэру. Усё пачыналася ў 9 раніцы і заканчвалася далёка за поўнач. У рамках форуму прайшлі мітынг-рэквіем з удзелам ветэранаў 203-га гвардзейскага Арлоўскага палка дальняй авіяцыі, ускладанне кветак ад удзельнікаў форуму ля мемарыяла ў канцлагеры ў в. Калдычэва, дыялог пакаленняў «У адзінстве сіла!», студэнцкая навукова-практычная пляцоўка «Актуальныя здароўезберагальныя тэхналогіі і методыкі», маса разнастайных конкурсаў, арганізаваных як аргкамітэтам, так і самімі камандамі актывістаў (у фармаце гадзінных моладзевых пляцовак), адкрыты фестываль гумару, песенны марафон, святочная дыскатэка. Актывісты прынялі ўдзел у «Сцежцы выжывання» і розных спартыўных спаборніцтвах.

Яскравым эмацыйным момантам стаў канцэрт творчых калектываў БарДУ, прысвечаны 72-й гадавіне Вялікай Перамогі. 

Цікавая, насычаная, разнастайная праграма форуму не пакінула раўнадушным ні аднаго яго ўдзельніка! Лідары самакіравання размаўлялі, спявалі, танцавалі і весяліліся. Буру станоўчых эмоцый, уражанняў, дыпломы пераможцаў павезлі дадому больш за 200 маладых, актыўных, мэтанакіраваных лідараў з Беларусі і Украіны!

Адміністрацыі БарДУ і арганізатарам форуму ўсе ўдзельнікі «пакінулі» вялікі дзякуй за высокі ўзровень арганізацыі мерапрыемстваў міжнароднага ўзроўню і прадстаўленую магчымасць мець зносіны, абменьвацца вопытам і проста сябраваць, нягледзячы на межы, нацыянальнасці і адлегласці!

Больш падрабязную інфармацыю аб тым, як прайшоў форум, можна даведацца ў сацыяльнай сетцы «Вконтакте» на старонцы групы «Газета БарДУ on-line» (vk.com/news.barsu) і старонцы групы «Студэнцкае самакіраванне БарДУ» (vk.com/studentsofbarsu ).

10.05.2017