Навіны ўніверсітэта

16 лютага прайшла конкурсная праграма "Таемны свет навукі вачыма моладзі», арганізаваная Студэнцкім навуковым таварыствам (СНТ) універсітэта. За званне лепшага СНТ змагаліся 4 факультэты ўніверсітэта.

Фармат мерапрыемства - сцэнічныя выступленні каманд СНТ факультэтаў у рамках конкурсных заданняў, якія ўключалі ў сябе: творчае прадстаўленне каманд (візітоўка, назва, дэвіз і эмблема), змаганне ў дасціпнасці, прэзентацыю і абарону падрыхтаваных навуковых праектаў «Таемны свет навукі вачыма моладзі», прадстаўленне спосабаў арыгінальнага тлумачэння значнасці для студэнтаў-першакурснікаў навуковай дзейнасці і перспектыў, якія яна адкрывае перад імі. На мерапрыемстве гучалі музычныя кампазіцыі. Найбольш яркае ўражанне на аўдыторыю зрабіла кампазіцыя Алесандра Сафіна «Luna Tu» на скрыпцы ў выкананні Мейлах Святланы, студэнткі групы ГЭ-31 факультэта педагогікі і псіхалогіі.

На ўрачыстым адкрыцці мерапрыемства з прывітальным словам выступілі: Ала Васільеўна Нікішова, прарэктар па навуковай рабоце, кандыдат філалагічных навук, дацэнт, старшыня журы; Таццяна Яўгенаўна Яцэнка, в.а. загадчыка кафедры псіхалогіі, кандыдат псіхалагічных навук, кіраўнік СНТ універсітэта, член журы; Дзмітрый Генадзевіч Навiчук, студэнт 3 курса спецыяльнасці «Геаэкалогія», намеснік кіраўніка СНТ універсітэта. У склад журы таксама ўваходзілі: Тучына Ірына Янаўна, метадыст па інавацыйнай дзейнасці аддзела міжнароднай і інавацыйнай дзейнасці; Наліўка Алег Ігаравіч, прызёр Рэспубліканскага конкурсу навуковых работ-2016, дыпламант Міжнароднага агляду-конкурсу навуковых работ-2016 у г. Белгарадзе, выпускнік Баранавіцкага дзяржаўнага ўніверсітэта, выкладчык-стажор кафедры абсталявання і аўтаматызацыі вытворчасці інжынернага факультэта; Піліпчук Ганна Мікалаеўна, стыпендыят спецыяльнага фонду Прэзідэнта Рэспублікі Беларусь, стыпендыят Брэсцкага абласнога выканаўчага камітэта, уладальнік звыш 20 узнагарод і падзяк універсітэцкага, абласнога і рэспубліканскага ўзроўняў, прызёр Рэспубліканскага конкурсу навуковых работ-2016, выпускнік Баранавіцкага дзяржаўнага ўніверсітэта, выкладчык-стажор кафедры педагогікі факультэта педагогікі і псіхалогіі; Бойка Ганна Іванаўна, магістр філалагічных навук, кіраўнік навуковага гуртка "Лінгва-акадэмія", аўтар 29 навуковых артыкулаў і вучэбна-метадычных дапаможнікаў, старшы выкладчык кафедры тэорыі і практыкі англійскай мовы факультэта славянскіх і германскіх моў; Гардзейчык Сняжана Віктараўна, магістр эканамічных навук, кіраўнік студэнцкай лабараторыі эканамічных даследаванняў "Палада", выкладчык кафедры тэарэтычнай і прыкладной эканомікі факультэта эканомікі і права.

Конкурс «Таемны свет навукі вачыма моладзі» праходзіў пры фінансавай падтрымцы пярвічнай арганізацыі грамадскага аб'яднання "Беларускі рэспубліканскі саюз моладзі».

На мерапрыемства былі запрошаны студэнты 1-2 курсаў. Студэнты мелі магчымасць пераканацца ў тым, што праца СНТ універсітэта спалучана не толькі з сур'ёзнымі навуковымі распрацоўкамі, але і з атрыманнем пазітыўных эмоцый, яркіх уражанняў, вопыту супрацоўніцтва і магчымасцю творчага самавыяўлення.

Прарэктарам па навуковай рабоце Алай Васільеўнай Нікішовай былі ўручаны дыпломы камандам-прызёрам.

Пераможцам конкурсу стала каманда СНТ «Спектр» інжынернага факультэта, якая атрымала аднагалосную высокую ацэнку членаў журы. Капітан каманды - Сямашка Марыя, студэнтка групы ЭАВ-31, намеснік кіраўніка СНТ універсітэта на інжынерным факультэце, стыпендыят спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў. Сакратаром БРСМ Кірылам Мікалаевічам Яўцюшыным камандзе быў уручаны сертыфікат на наведванне боўлінга ў Лядовым палацы.

Дыпломам другой ступені ўзнагароджана каманда СНТ факультэта педагогікі і псіхалогіі «OWLS» (Our World Like Science). Капітан каманды - Каскевіч Кацярына, студэнтка групы ДП-51, намеснік кіраўніка СНТ універсітэта на факультэце педагогікі і псіхалогіі, стыпендыят спецыяльнага фонду Прэзідэнта Рэспублікі Беларус па сацыяльнай падтрымцы адораных навучэнцаў і студэнтаў. Каманда атрымала сертыфікат на наведванне сеансу вольнага катання на каньках ў Лядовым палацы.

Уладальнікам дыплома трэцяй ступені стала каманда СНТ факультэта эканомікі і права. Капітан каманды - Жучко Валянціна, студэнтка групы ПГ-42, намеснік кіраўніка СНТ універсітэта на факультэце эканомікі і права. Каманда атрымала ад сакратара БРСМ Кірыла Мікалаевіча Яўцюшына сертыфікат на фізкультурна-аздараўленчыя заняткі ў плавальным басейне БарДУ.

Удзел каманды «ЛінгвАрт" факультэта славянскіх і германскіх моў у конкурснай праграме быў адзначаны падзякамі. Капітан каманды - Паўлоўская Дар'я, студэнтка групы СЗМ-11, намеснік кіраўніка СНТ універсітэта на факультэце славянскіх і германскіх моў.

Віншуем пераможцаў конкурсу і жадаем далейшых навуковых дасягненняў!